Nuvvu - Neenu

అమ్మ

2010-05-09T18:50:00.007+05:30

అమ్మ అంటే
నీ కంటూ అస్తిత్వం లేనప్పుడు కూడా నిన్ను కోరుకొంది. నువ్వు ఎలా ఉంటావో తెలియకపోయినా ప్రేమించింది.
నువ్వు కనిపించటానికి గంట ముందునుంచి నీ కోసం ప్రాణాలు అర్పించటానికి సిద్ధపడింది. నువ్వు నోరు విప్పి చెప్పలేనప్పుడు ని భాష అర్ధం చేసుకొని నిన్ను సాకింది. నీ చిరునవ్వు ఒక వరంలా భావించి పొంగిపోయింది. నువ్వు చలికి వణుకుతుంటే వెచ్చని దుప్పటి కప్పి , నీకు కాస్త అనారోగ్యం చేస్తే తన నిద్ర మానుకొని నిన్ను చూస్తూ తెల్లవార్లూ జాగారం చేసేది. నీ నువ్వు ముఖం చూసి సంతృప్తి పొందేది.
నీకు గోరుముద్దలుతినిపించి , నీ తప్పటడుగులు నుంచి నడక నేర్పించి ఒక గురువులా అన్ని విషయాలలో తర్ఫీదు ఇచ్చి నువ్వు జీవితం లో గెలిచి నప్పుడల్లా తన గెలుపులా భావించి అదే పండగలా అనుకొంది.
వేసవి సెలవలకి అమ్మమ్మ ఇంటికి వెళ్ళడం ఒక మధురను భూతి . అమ్మమ్మ, తాతయ్య, మామయ్యలు, పిన్నిలు అమ్మ ఆస్తిపాస్తులు. ఎవరిని కదిలించిన అమ్మ జ్ఞాపకాల దొంతర. అమ్మ చిన్నతనం , ఇరుగు పొరుగు అమ్మ గురించి చెప్పే మాటలు ఒక్క పదం కూడా జారిపోకుండా జాగ్రత్తగా మనసులో భద్రపరుస్తాం.
అమ్మ అనే పదం లో అందం, ఆనందం , కమ్మదనం , తీయదనం రంగరించి ఉన్నాయి. అమ్మ ప్రేమకు మారు పేరు.
అమ్మ గురించి ఎంత చెప్పిన తరగదు.

గిన్నిస్ వరల్డ్ రికార్డ్స్

2010-03-14T23:51:00.002+05:30

అన్నమయ్య లక్ష గళార్చన లో పాల్గొని గిన్నిస్ వరల్డ్ రికార్డ్స్ మనం సాధించిన సందర్భం లో వాళ్ళు ఇచ్చిన ప్రశంస పత్రం .

జ్ఞాపకం

2010-02-04T21:15:00.002+05:30

నీ జ్ఞాపకాలు నీలి మేఘల్లా కదలిపోతున్నాయి
గుబులు తెరలై అవి మనసంత ఆవరించి
మళ్లీ అవే వానచినుకులై నా మనసును
మయూర నాట్యం చేయిస్తున్నాయి

చల్లగాలి నీ చిరునవ్వును జ్ఞాపకం చేస్తోంది
నైట్ క్వీన్ సువాసనలు మైమరపిస్తున్నాయి

ప్రేమ

2010-02-01T00:21:00.002+05:30

ప్రేమంటే మానసిక భావన. ఒక వ్యక్తిని ప్రేమిస్తే వారి హెచ్చుతగ్గుల్ని బట్టి ప్రేమ మారదు. నిజంగా ప్రేమిస్తే వాళ్ళ కళ్ళలోనూ, ముఖంలోనూ సంతోషం తుళ్ళి పడుతుంది. ప్రేమలోని ప్రకంపనలు వాళ్ళున్న చోటంత వ్యాపిస్తాయి.

ప్రేమలో బంధం తీయగా ఉండాలంటే అక్కడ ఆదాయానికి సంబంధించినవేమి ఉండకూడదు.ఎదుటి వారి నుండి ఏ లాభం పొందగలమా అని ఆలోచిస్తే ఆ క్షణం ప్రేమ పోతుంది.

ప్రేమ నిజంగా ఉంటె సుఖంగా ప్రయాణం చేయ వచ్చు.

స్నేహం

2010-01-30T20:04:00.002+05:30

స్నేహానికి పునాది పరిచయాలే. ఏ వ్యక్తి అయిన ముందు పరిచయం అయిన తరువాతే స్నేహితులుగా మారతారు.
చిన్ననాటి స్నేహితులు, కాలేజీల్లో ఎదిగిన స్నేహాలు ఒక ఎత్తు. మన నిత్య జీవితంలో ఎదురయే నేస్తాలంతా మరో ఎత్తు.
అక్కడక్కడ తారసపడుతూ మధురమైన అనుభూతులు పంచుతారు. వయస్సు నిమిత్తం లేదు, అభిరుచులు కలవాలనే రూలు లేదు. జీవితం అనే ప్రయాణంలో ఎందరో వస్తు వెళుతూ ఉంటారు. ఒక్కోసారి మంచి మిత్రులను పరిచయం చేస్తుంది. కొన్ని పరిచయాలు విడదీయ లేనివిగా మారతాయి.

నవ్వుతు నవ్విస్తూ ఉన్నవారి చుట్టూ స్నేహితులు ఉంటారు. చిరునవ్వు తో పలకరించడం ఒక కళ. చుట్టూ పక్కల వాళ్లతో , పనిచేస్తున్న చోట కాస్త చతురత తో , ఆహ్లాదకర సంభాషణలు చేస్తే వారికీ మనని దగ్గర చేసి మనం కొన్ని రోజులు కలవలేక పొతే వాళ్ళు మన గురించి ఎదురుచుసేలా చేస్తాయి. అటువంటి స్నేహం పొందడం మన అదృష్టం.

సృష్టిలో తీయనైనది స్నేహ బంధం. మనం ఎవ్వరితోను చెప్పుకోలేని విషయాలు స్నేహితునితో/స్నేహితురాలితో చెప్పుకొని ఉరట పొందవచ్చు. ఒక్కోసారి వాళ్ళ సలహాలు మన జీవితాన్ని మార్చవచ్చు. మన ఉన్నతికి కారణం అవ్వచ్చు.

ఒక కవి అన్నట్లు స్నేహం లేని జీవితం పూలు లేని తోట వంటిది.

విలువ

2010-01-26T13:41:00.003+05:30

ఒక వారం విలువ తెలియాలంటే - వార పత్రిక సంపాదకుడి నడగాలి .
ఒక గంట విలువ తెలియాలంటే - ప్రేయసి కోసం తహ తహలాడే ప్రేమికుడి నడగాలి .
ఒక నిమిషం విలువ తెలియాలంటే - రైలు బండి మిస్సయిన పెద్ద మనిషి నడగాలి.
ఒక క్షణం విలువ తెలియాలంటే - తృటిలో పెద్ద ప్రమాదం నుండి బయటపడిన అదృష్టవంతుని అడగాలి.
ఒక సుక్ష్మతి సూక్ష్మమైన విలువ తెలియాలంటే - ఒలింపిక్స్ లో రజిత పతకం గెలుచుకొన్న క్రీడాకారుని అడగాలి.

కన్నీరు

2010-01-24T19:18:00.003+05:30

భావోద్వేగాల కలబోత లో ఒక్కోసారి అసంకల్పితంగా మనుషులు కన్నీరు జారవిడుస్తారు .
దుఖం , దిగులు, బాధ , వేదన వంటి సందర్భాల్లోనే కాక ఆనందం ఎక్కువైనా కళ్ళు సజల నేత్రలవుతాయి.
జ్ఞాపకాలు, కలలు, ఎవరో తలపు కొచ్చినపుడు కళ్ళు చెమ్మగిల్లి, గుండె ఆర్ద్రమై పోతుంది. కొంతమంది ధైర్యంగా వున్నట్లు కనిపిస్తారు. కాని అత్మీయుడైన మిత్రుడు ముందు జ్ఞాపకాల్ని కలబోసుకొంటూ తెలియకుండానే కన్నీరు పెట్టుకొంటారు. ఎందుకంటే కన్నీళ్ళు స్వచ్చమైనవి.

మార్పు

2010-01-17T23:00:00.006+05:30

మార్పు అనేది సహజం. పరిస్తితులు , స్తితి గతుల బట్టి మార్పులోస్తూ ఉంటాయి. అకస్మాత్తుగా ఆర్ధిక పరిస్తితులలో మార్పులు సంభవించినపుడు చికాకు కలగవచ్చు, స్నేహాల్లో బంధుత్వాల్లో తేడ రావచ్చు.

మార్పు తమ జీవనాన్ని మరింత మెరుగుపరుస్తుందని భావించి ఆహ్వానిస్తే ఆనందం. మార్పు నిరంతరం చోటు చేసుకొనే ప్రక్రియ. దీనివల్ల సృజనాత్మకత పెరిగి మనస్సు భిన్న మార్గాలలో ఆలోచిస్తూ చైతన్యం పొందుతుంది. లక్ష్య సాధనకు మార్పు తప్పనిసరి.

సాంకేతిక విజ్ఞానంలో , ఆలోచన విధానంలో మార్పు రావచ్చు. వీటిని మనం అంగీకరించాలి. లేకపోతే ఒత్తిడే కలుగుతుంది.

నులి వెచ్చని సూర్య కిరణాలూ ఆకు పచ్చని గడ్డి ఆమోదించినట్టుగానే మనం కూడా మార్పు ను ఆహ్వానించాలి.

కొన్ని సమయాల్లో మార్పు కష్టంగా, గందర గోళంగా అనిపించవచ్చు. సమస్యలను ఓర్పుతో పరిష్కరించుకొనే శక్తి అవకాశం ఉంటాయి. ప్రశాంతంగా ఆలోచనలని, ప్రాధాన్యత క్రమాన్ని చూసుకోవాలి. మార్పు వల్ల జీవితం ఎంతో ఆనందంగా ఉందని గ్రహిస్తాం.

మార్పు సుదీర్ఘంగా ప్రయాణం చేస్తే అలసట అనిపించి మనసు మొరాయిస్తుంది. తరువాత మార్పు కొత్తదనంతో, ఆనందంతో ఉరకలు వేస్తుంది.

సంక్రాంతి

2010-01-12T21:13:00.003+05:30

తెలుగు వారి పండగల్లో విశిష్టమైనది సంక్రాంతి.
శ్రామిక జీవన సంస్కృతి లోంచి , పాడిపంటల సౌభాగ్యం లోంచి ఆవిర్భవించిన పండగ యిది.
హేమంతం లోని చల్ల చల్లని గాలులు తనువును సృసిస్తుండగా , ప్రాతః కాలంలో కురిసే మంచు జల్లులు, పచ్చని పచ్చికపై పడి ముత్యాల్లా మెరుస్తున్న మంచుబిందువులు ఈ సుందర వాతావరణం లో వచ్చేది ధనుర్మాసం.
ఈ ధనుర్మాసం చివరి మూడు రోజులు సంక్రాంతి పండుగగా జరుపుకొంటాం.

ధనుర్మాసం అంతా ముగ్గు లు వేయడం , గొబ్బెమ్మలు పెట్టడం తో కళకళలాడుతుంది. సంక్రాంతి మూడు రోజుల పండగ. మొదటి రోజు భోగి. ఈ రోజు ఉదయమే లేచి వీధి లో వేసే పెద్ద మంటలని భోగి మంటలని అంటారు. సాయంత్రం భోగి పండ్ల పేరంటం లో రేగు పళ్ళు , పువ్వుల రేకలు, చిల్ల ర పైసలు కలిపి చిన్న పిల్లలకు తలమీద నుంచి పోస్తారు.ముతైదువులను ఇంటికి పిలిచి వాయనాలు ఇస్తారు.

సంక్రాంతి ఉత్తరాయణ పుణ్య కాలం. సూర్యుడు మకర రాశి లోకి ప్రవేశించే రోజు. ఇంటి ముందుకు వచ్చి నృత్యంతో మురిపించే హరిదాసు, బుడబుక్కల వారు ఇంటింటికి తిరిగి వారి చ్చిన కానుకలు తీసుకు వెళతారు. వాకిళ్ళు రంగు రంగుల ముగ్గులతో కళకళ లాడుతూ ఉంటాయి. ధాన్య రాసులని పూజిస్తారు.

కనుమ పండగ కర్షకుల పండగ. పశువుల ను కడిగి అలంకరించి పసుపు, కుంకుమ , పూలతో పూజించి పొంగలి నైవేద్యం పెడతారు. పువ్వుల దండలు వేసి , కాళ్ళకు గజ్జలు , మెడకు గంటలు కట్టి ఊరేగిస్తారు.

పల్లె సంస్కృతి , వ్యవసాయ సంస్కృతి కి సంబంధించిన పండగ సంక్రాంతి. మానవ సంబంధాలలో స్నేహానికి తార్కాణంగా నిలిచే పండగ.

వీడ్కోలు

2009-12-21T21:02:00.003+05:30

ఇంకొక పది రోజులలో ఈ ఏడాది కి వీడ్కోలు చెప్పె సమయం ఆసన్నమైంది.
మనం సాధించినదేమిటి ? మన విజయాలు , వైఫల్యాలు ..........
పొందిన స్నేహాలు ఎన్ని ?
అత్యంత ఆనందానికి లోను చేసిన సన్నివేశాలేమిటి ? విషాదానికి లోను చేసిన సందర్భాలు ఒక్కసారి అవలోకించండి.

వీటి గురించి ఒక నోట్ బుక్ లోనో, డైరీ లోనో ఈ డిసెంబర్ చలి రాత్రుల్లో ఏకాంతంగా కూర్చుని గతాన్ని అది ఇచ్చిన అనుభవాలు రాయండి.
ఇది మున్ముందు కాలాన్ని మరింత సుందరంగా మలచుకోవడం నేర్పుతుంది. కాలం విలువ తెలుస్తుంది.

గీతాంజలి

2009-12-04T22:51:00.002+05:30

శీతల పవన స్పర్శకి స్వల్ప కంపనంతో
రెల్లు వెన్నెలలో సంగీత స్వరాన్ని
ఆలపించినట్లు ఈ నా శూన్య హృదయం
వలపిస్తే శిలలు కూడా అశ్రువులు కారుస్తాయి.

రవీంద్రుని గీతాంజలి ఎన్ని సార్లు చదివినా కొత్తగానే ఉంటుంది. మనసుని కదిలిస్తుంది.

నువ్వు

2009-11-25T19:19:00.002+05:30

అస్తమాను తల వంచుకొని
భూమిలో ఏం వెతుకుంటావు
అదిగో ఆకాశం ఎన్నెన్ని అందాలు
సంతరించు కుంటుందో ఆసక్తిగా చూడమన్నావు
నవ్వటం నేర్పావు
నలుగురిలో ధైర్యంగా నడవటం నేర్పావు.

నీ కోసం

2009-11-23T17:34:00.003+05:30

నీ చిన్ని నవ్వు కోసం
రవ్వంత ప్రేమ కోసం
నీ మనసు ముంగిట పడిగాపులు కాసాను
నిరంతరం నిరీక్షణ అనుక్షణం నీ ఆలోచన
నీ జ్ఞాపకం జాజిపూల సువాసనలని మోసుకొస్తుంది
నా మనసుని మెత్తగా హత్తుకొంటుంది.

జీవితం

2009-11-21T23:28:00.003+05:30

బాల్యమంతా నేర్చుకోవడమే మాటలు, ఆటలు, నవ్వులు, చేష్టలు. పడతాం, లేస్తాం, నడుస్తాం. దాన్ని శిక్షగానో ఎవరో పెట్టిన పరీక్ష గానో భావించం. నడక రాగానే పరుగెత్తడం, గెంతడం, ఎక్కడం ఇష్టాలను బట్టి సైకిలు లేకపోతె ఈత కొట్టడం నేర్చుకొంటాం. అనుకొన్నది సాధించేదాకా వదిలిపెట్టం.స్కూల్లో , కాలేజిలో చదువుతోపాటు ఆటల్లో, పాటల్లో ఆసక్తిని పెంచు కొంటాం. ఏది కష్టం అనిపించదు. అంతేకాక ఆనందాన్ని, ఉత్సాహాన్ని ఇస్తుంది. మనం ఏదో సాధించామన్న తృప్తి ఉంటుంది.

అప్పుడు లేని భయం పిరికితనం మనం స్వతంత్రంగా బతకవలసి వచ్చి నప్పుడు నిర్ణయాలు తీసుకోవలసి వచ్చి నప్పుడు తెగ ఆలోచిస్తాం, బుర్ర బద్దలుకొట్టుకొంటాం . ఎదుటివారితో పోటిపడకుండా వాళ్ళలో నేర్చుకోవలసిన అంశాలు చూడకుండా వాళ్ళకేదో ఉంది అందుకే త్వరగా కీర్తిని, డబ్బుని సంపాదిస్తున్నారని బెంగ పడతాం.

చిన్నతనం లో మనం ఎంత మంది ఉన్నా మనకు నచ్చిన మాటలు బెదురులేకుండా , తప్పులున్న పట్టించుకొనే వాళ్ళం కాదు. పైగా మనదే కరెక్ట్ అని వాదించే వాళ్ళం.మరి పెద్ద అయ్యాక మన ఉద్యోగాల్లో పదిమంది ముందు మాట్లాడానికి కంగారు పడతాం. సమూహం చూడగానే కాళ్ళు చేతులు చెమట పట్టి వణుకుతాయి. అప్పుడు తెలుసుకోవాలన్న తపన. ఇప్పుడు అన్ని వచ్చు అనే అహంభావం. ఏమి రావడం లేదు అన్నా నిరాసక్త. ఎందుకు ఇలా ... అప్పటిలానే హాయిగా , ఆనందంగా, నవ్వుతు, నేర్చుకొంటూ, నేర్పుతూ నిరంతరం కొత్తగా ఉండచ్చు కదా!

కొత్తగా ఏదైనా చేయవలసి వచ్చినప్పుడు వెనకడుగు వేస్తాం, తడబడటం ఎందుకు! చేసే ప్రతి పని లోను ఒక అవకాశం దాగుందని గుర్తించగలిగితే సమస్యలు సమస్యల్లా అనిపించవు.

జీవితమంటే చిన్న చిన్న ఆనందాలు, అనుభూతులు, స్వచమైన చిరునవ్వు. అప్పుడు ప్రతి రోజు శుభోదయమే.

స్నేహం

2009-11-20T21:54:00.004+05:30

ఏ విషయమైన కొత్తగా ఉన్నప్పుడే బాగుంటుంది కానీ , స్నేహం మాత్రం పాతబడిన కొద్ది బాగుంటుంది. చెలిమికి ఉన్న సుగుణం . చిరకాలం నిలిచే వసంతం. ప్రయోజనాలతో స్నేహం ముడిపడి ఉండదు. ఒక వేళ దగ్గరైన ప్రయోజనాలు నెరవేరక దూరం జరుగుతారు. కానీ స్నేహం ఇచ్చిపుచ్చు కోవడాలు కన్నా అతీతమైనది.

స్నేహం చేయడానికి తర్ఫీదు ఉండదు. శిక్షణ కోర్సులు ఉండవు. స్నేహంగా ఉండాలన్న తపన ఉండాలి. ఎదుటి వాళ్ళు చెప్పింది వినగలిగే ఓర్పు ఉండాలి. మనసులో మాట చెప్పుకోగలగాలి. అలాంటప్పుడే స్నేహం ఎదుగుతుంది.
ఏదైనా పని ఉంటే తప్ప పలకరింపులు లేని ప్రపంచంలో స్నేహం అంత సులువు కాదు. కరుణ , మనుషులను అర్ధం చేసుకోగలిగే ఓర్పు, క్షమా గుణం ఉండాలి.

ఎదుటి మనిషి లో లోపాలు ఎంచడం కాకుండా ఆ మనిషి అలాఎందుకు ప్రవర్తిస్తున్నాడో తెలుసుకోగలిగే సహనం ఉండాలి. ఇలాంటివారు ఇతరులపట్ల సున్నిత హృదయంతో స్పందిస్తారు. ఇది స్నేహానికి అవసరమైన లక్షణం. ఇంతటి ఉదాత్త ఇద్దరి మధ్య ఉన్నప్పుడు ఆ చెలిమి అపూర్వం.

ఆశ

2009-10-04T21:54:00.003+05:30

మంద్రంగా - శీతాకాలపు సాయంత్రాలలో వీచే చల్లని గాలుల్లా , శరద్రాత్రులలోని లేత వెన్నెలవలె, ప్రాతః కాలపు పిల్ల తెమ్మెరలా, ఆకాశంలో ఎగిరే పక్షిలా, మంచులో తడిసిన గులాబీ పువ్వులా, చీకటిలో ఎగిరే మిణుగురు పురుగులా, చెట్ల కొమ్మల మధ్య నుంచి కూసే పిట్టలా, అర్ధరాత్రి తోట మధ్యలోని నిశబ్ద సంగీతంలా మారిపోవాలని ఆశ.

కలలు

2009-10-03T21:58:00.004+05:30

క్రమశిక్షణ , ఆశ వున్నప్పుడు మనసు మిత్రునిలా సహాయం చేస్తుంది.
నిరాశకు లోనైన మనసు శత్రువులా వ్యవహరించి జీవితాన్ని నాశనం చేస్తుంది.
గుండెలోతుల నుంచి ఆలోచించేవారికి లక్ష్యం స్పష్టంగా కనిపిస్తుంది. పైపైన ఆలోచించేవారు కలలు మాత్రమే కంటారు. తరచి చుడగాలిగినవారు మేల్కొని వాటిని నిజం చేసుకొంటారు.

చదువు ఒక్కటే పరమార్ధం కాదు. పరిశీలన, తార్కికత, నిబద్దత, పట్టుదల, క్రమశిక్షణ వుండాలి. అప్పుడే పైకి రావడానికి అవకాశంతో పాటు విజయం వరిస్తుంది.
ఎప్పుడైతే క్రమశిక్షణ , కృషి సమపంధలో ఉంటాయో అప్పుడు మన గమ్యం సాధిస్తాం. మన ఆశయదిరోహణలో ఒక క్రొత్త ఒరవడిని సృష్టిస్తాం.
ఎప్పుడు చలాకీగా, హుషారుగా వుండేవారు నిరాశ నిసృహలకి దూరంగా వుంటారు.

ఒకసారి మన కలలు నిజమైపోయాక చుట్టూ ప్రపంచాన్ని జాగ్రత్తగా గమనించాలి. మన ఆలోచనలని ఎప్పటికప్పుడు పదును పెట్టాలి. చేసే పని సృజనాత్మకంగా కనిపించాలి, వుండాలి. అన్ని సాధించేసాను అని అనుకొంటే అక్కడితో మనం ఆగిపోతాం . నిరంతర సాధన మనకి కీర్తికిరీటాలు సంపాదించి పెడుతుంది.

ఉత్తరం

2009-10-02T23:38:00.003+05:30

ఒక మిత్రుడో/ మిత్రురాలో ఉత్తరం రాస్తే అది చేరడానికి కొన్ని రోజులు, తిరిగి మనం ఒకొక్క వాక్యమే పేర్చుకొంటూ జాబు రాస్తే మరికొన్ని రోజుల్లో వాళ్ళకందేవి.

మళ్లీ ఉత్తరం కోసం ఎదురుచూడడం అందులో మనకోసం అమరిన అక్షరాలు , మనల్ని ఉద్దేశించిన భాష , మనం లక్ష్యం గా సాగిన భావన ఎంత వింతైన అనుభుతిలిస్తాయోకదా !

పాతవి అప్పుడప్పుడు చడువుకోవడంలో ఎంత ఆనందం ఉండేది.
ఇప్పుడు అంతా ఫోనులూ, దాని నుండే సందేశాలు. ఎదురు చూడడం లేదు. సమయం లేదంటూ చాలా కోల్పోతున్నాం.

మానవ సంబంధాలు

2009-09-15T00:22:00.000+05:30

మన వల్ల పొరపాటు జరిగినప్పుడు క్షమించమని అడగటం , మరొకరి వల్ల మనం మేలు పొందినప్పుడు కృతఙ్ఞతలు చెప్పడం కద్దు.

మనం థాంక్స్ , సారీ అలవాటు చేసుకోన్నాం. భాష ఏమిటన్నది మనసులో పెట్టుకోకుండా భావాన్ని వ్యక్తం చేయడం వల్ల మానవ సంబంధాలు మెరుగు పర్చుకోన్నవాళ్ళం అవుతాం . ఇందులో ఏమాత్రం సందేహం లేదు.

థాంక్స్, సారీ అన్న రెండు పదాలు ఎంత శక్తివంతమైనవో ఎంతోమందికి తెలీదు. అంతే కాదు మానవ సంబంధాలు మెరుగు పరచడంలో ఈ రెండు పదాలు చాల దోహదపడతాయి.

మాట్లాడం ఒక కళ

2009-09-06T19:50:00.005+05:30

కొంతమంది మాట్లాడుతుంటే ఎంత సేపు విన్న తనివి తీరదు. వారి మాటలు ఇంకా ఇంకా వినాలనిపించేంత ఆసక్తికరంగా, మధురంగా ఉంటాయి. చక్కని పదాలు ఉపయోగించడం , సులువైన వాక్య నిర్మాణం , సరైన ఉచ్చారణ కలిగి ఉండటం వీరి ప్రత్యేకత.

భాష మీద పట్టు , మాట్లాడుతున్న అంశంపై అవగాహన, ఆకట్టుకొనేలా మాట్లాడే తీరు చూసి ఎదుటి వ్యక్తులు ముచ్చట పడతారు.

వీరి మాట్లాడే తీరు గురుతుకొచినప్పుడు అసంకల్పితంగా చిరునవ్వు కదులుతుంది.

ఆసక్తికరంగా , వినసొంపుగా మాట్లాడం ఒక కళ . కొందరికి స్వతః సిద్దంగా వస్తే మరి కొందరికి సాధనతో అలవరచుకొంటారు.

మనం అలా మాట్లాడలేకపోతున్నందుకు బాధ పడతాం. కానీ కొంచెం సాధన చేస్తే మనం కూడా అలా మాట్లాడవచ్చు . సహనంతో వ్యవహరించడం, ఆలోచనలలో సమయస్పూర్తి కలిగి ఉండటం, వివరించడంలో స్పష్టత , విషయ పరిజ్ఞానాన్ని పెంపొందించుకోవడం , భాష మీద పట్టు సాధించడం , కంఠధ్వని మెరుగుపరచుకోవడం వల్ల వినసొంపుగా మాట్లాడవచ్చు.

గులాబీ

2009-08-30T21:01:00.004+05:30

ఆకు పచ్చ ఆకుల మధ్య హుందాగా ఆందంగా ఉంటుంది గులాబీపువ్వు. కానీ ఒంటరిది. ఇతరులకి మానసికానందాన్ని ఇస్తుంది. మనకి అర్ధం చేసుకోగల శక్తి ఉంటే దాని మౌన భాష లో చాల విషయాలు చెబుతుంది.

మనం ఎవరికైనా శుభాకాంక్షలు చెప్పడానికి , అబినందనలు తెలుపడానికి ఒక గులాబీ గుత్తి ఇస్తాం . అది అందుకొన్న వారు ఒక్క క్షణం తదేకంగా దానిని చూసి చిరునవ్వు తో మనని పలకరిస్తారు . ఇష్టపడే వాళ్ళైతే ఆ పువ్వులు చెప్పే ఊసులు నిశ్శబ్దం గా విని ఆనందిస్తారు.

వర్షం

2009-08-29T22:41:00.000+05:30

కమ్ముకొచ్చేమబ్బులు , కురవాల వద్దా అని మేఘాలు ఆడే దోబూచి ఆటలు, ఒక చినుకు తో వర్షం మొదలవుతుంది. వర్షం తో వచ్చే మట్టి వాసన, కిటికిలోంచి ఆకాశం చూస్తుంటే ధారలుగా కురిసే జల్లు , చిన్నపుడు ఆ వానలో కాగితాలతో పడవలు చేసి ఆడుకొన్న ఆటలు, వాన వాన వల్లప్ప అంటు తడిసి తర్వాత జలుబు చేస్తే అమ్మ మెత్తని మందలింపులు , చినుకులు ఆకులపై రాలి ముత్యాల్లా మెరుస్తుంటే వింతగా చూడడం ఏదో కొత్త విషయం కనుకోన్నట్లు , చేలల్లో రైతులు నాట్లు పెడుతూ ఆనందంతో పాడే పల్లె పాటలు వర్షగమనంతో మా పల్లె పచ్చని అందాలు సంతరించుకొంటుంది.

ప్రేమ

2009-08-27T08:10:00.000+05:30

ప్రేమ రెండు అక్షరాలే అయినా దాని వెనుక నిశబ్దం ఉంది. వేదన ఉంది . తపన ఉంది. అంతే స్థాయి లో ఆత్మీయత , ఆనందం ఉద్వేగం కూడా ఉంటుంది.

నీ జ్ఞాపకం

2009-08-18T22:26:00.000+05:30

కొబ్బరాకుల మద్య వచ్చే చారల చారల వెన్నెల, ప్రక్కన ప్రవహించే ఏటి గట్టు గలగలలు , దూరంగా చేలల్లో ఎవరో పాడే పాట, చీకటి రాత్రులలో నల్లని చుక్కల చీర ధరించే వినీలాకాసం ,వెల్లకిలా పడుకొని ఆకాశాన్ని వీక్షిచడం ----------------------- నీ జ్ఞాపకం జాజిపూవులా గుబాలిస్తూనే ఉంటుంది